第三場「先到先得」賽前繼續有上從化操練，埋門再有大閘砥礪，但不同地方為加頭罩出試，大閘走勢無大不妥，不過一如近仗般比較慢腳，稍恐加頭罩後前速更慢，在無步速場合排中內檔會輸蝕起動。
第六場「你知我得」埋門泥閘起步至直路走勢均見對辦，論態況仍在水準之上，贏馬後回得比較耐才上陣的部署向善。
「首飾天空」八月中已開操，開初大閘已有一定走勢，十二月初泥閘起步唔慢但立刻捉到實，當時馬兒在直路上已經有追，但數度換腳略有瑕疵，所以仍未安排上陣，之後十二月尾再試，沿途跟守陣上識贏及有走勢馬匹並無怯場，直路再鬆一鬆可跟「天將龍駒」同到終點，埋門從化閘騎落亦有追，似乎達到練者要求才安排上陣。
「銀刺勇士」泥閘起步及前速快，直路移出輕鬆追上，論態況亦不俗，惟千二賽績未明，七檔起步要考慮早段取位形勢，可爭欠穩格局。
第七場「怡昌精神」上仗敗後轉上從化作小休及操練，埋門大閘起步順滑，兩三箭步亦追上領放馬，末段再追亦輕鬆，小休後狀態仍勇。
第八場「我做到」相隔兩場再返從化，大閘起步留後競跑，輕抒步頭性質，慢步速直路移出外檔追勢亦不弱。同場「駟跑得」亦有大閘工序，馬兒起步應聲彈出，其後鞍上人拖後競跑而已，同樣論馬有作戰狀態，假如是晚谷草下半場利追，此駒或可受惠場地之利。
