新馬季將於9月8號開鑼，波仔和馬蕭蕭祝大家越贏越有，收錢收到手軟，全新節目《堅仔精選過關》將會推介一條連贏及位置Q過關，而馬膽亦可投注WP過關，開飛後有真飛作參考，希望關關難中關關中。
馬蕭蕭先揀第1場，以「皮具大師」做馬膽，配腳拖「同寶寶」、「上市魅力」及「樂天派」。 「皮具大師」在季尾不停轉換路程也可以於田草1600公尺上名，遲熟馬漸見進步，於煞科前刻意運往從化，跑道關閉時仍到機場踱步，並且早在7月26號已恢復快跳，試閘後返港再由湯普新主理，拍跳一課過馬姿態引，其後的單跳亦見上力，五歲馬保持良好進度，現評27分可能處於虛分階段，排3檔犯錯機會減低，可作半冷膽博。
配腳方面，「上市魅力」最近5場全入三甲，也是另一匹越跑越進步的五歲馬，近期戴半掩防沙眼罩試閘亦對辦，是正路的熱門實力馬。 「樂天派」連續4季的首戰都可上名，早前兩度試閘，屬有備而臨。 「同寶寶」上季於四班連續9場取得獎金，降至五班有競爭力，跑法主動，也可兼顧。
波仔就揀左第八場，WP及馬膽就揀左「一定掂」，呢匹馬初出已經係劣勢之下追得好，上場初跑千四之餘，起步慢左之餘，直路衝刺時亦一度受阻，但馬兒可回氣再上，否則已有力爭入三甲，埋門直路閘馬兒於兩匹馬中間追上現鬥心，狀態續進。
配腳揀返愛駒之一「極速贏」，當然今仗無上次咁好分頭，但四歲馬埋門泥閘走勢從容，於拆組之下有力再贏，「共享富裕」上仗跟新勝馬同樣衝得好，進步中馬匹。 「線路神騖」上場跑來欠點誠意兼際遇下都有追，泥閘起步反應不俗，如一檔能咬守好位，可爭冷位。波仔第八場 8.一定掂 拖 1 7 9。
