第二場「韋廄四歲馬」泥閘前速不弱，在布文胯下唔算太搶口，未段貫注力提升，觀乎今場前置馬唔算多，九檔如大閘認真搶前，不排除有變身可能。「文廄賽駒」從化大閘起步唔慢，沿途有前速跟前，直路催策亦見追勢。「容廄五歲馬」起步反應亦好，惟前速非上乘，馬兒直路沿欄追回多少失地，論態況亦好。
第三場「伍廄四歲馬」早前專程渡江試千七米抄外檔有追勢，埋門泥閘食沙後追勢亦不弱，馬兒似乎角逐意慾不俗。
「蔡廄新勝馬」一如上仗贏馬前有泥閘砥礪，馬兒起步稍稍慢，然而大長途馬試短途閘早段落後十分合理，亦跟上仗睇法一樣，名次稍後未需太介懷。
「另一匹蔡廄戰馬」陣前兩試大閘，千六米從化閘起步唔算快，但三兩箭步上前領放，末段愈走愈有，狀態仗比仗好。
第四場「羅廄新接手賽駒」加鼻箍試閘起步雖然稍慢，但沿途走規未見搶口，比在上手馬房時有進，而直路未曾轉腳下追勢頗強，似乎轉廄後有多少起色。
第六場「韋廄降班馬」泥閘起步反應及前速不俗，直路換正腳後催策有追，具作戰狀態。
「沈廄四歲馬」今仗跟上場同樣相隔21上陣的牠，埋門竟再有泥閘工序，備戰上頗積極，馬兒起步及前速亦見好，直路步頭不弱，躍躍欲試。
