第二場「小休復出的伍廄馬」泥閘起步反應快，騎者立刻拖住跟守第三位，直路換腳利落，末段輕策有追勢。第三場「蔡廄新馬勝」贏馬後回氣時間足，陣前兩課大閘砥礪，埋門一課起步及前速快，直路雖然無換腳但姿態仍然從容。
「近兩仗一勝一季的葉廄馬」從化大閘起步反應快，鞍上人立即拖後競跑，直路移出大外檔追勢強，論狀態有進無退。第四場「巫廄四歲馬」從化草閘起步唔慢，沿途跟前二疊，彎位逐步趕上，直路認真催策考驗走勢對辦。同組「蔡廄五歲馬」起步唔係特別快，順勢留後殿後跟跑而回。
「打疊兩勝的呂廄馬」泥閘起步對辦，終點前愈撲愈勁，勇況未減。同組也有「應屆打吡冠軍」馬兒起步唔慢，沿途中段位置跟跑，純粹熱身性質，此駒將出戰第八場女皇盃。第五場「短途馬王」起步後三扒兩撥一馬當先，直路大步走甩氣勢磅礡，狀態銳利。「蔡廄老對手」起步亦唔慢，沿途外疊競跑，惟末段省騎反應略不及早前。
第六場「蔡廄四歲馬」從化閘起步唔算太慢，沿途留守跑尾，直路撳住躍躍欲試，開步不弱。
「沈廄四歲馬」從化閘起步唔慢，隨後拖後跟跑，但馬兒走來有力，彎位再移出外疊，直路上未有特別催策，所以名次不用理會。
第七場「應屆香港金盃盟主」陣前試千六米閘，起步反應無問題，沿途大步領放步大力雄，當銳馬未見回落。「今年打呲亞軍」泥地起步反應仍然敏銳，跟守前列末段追上愈追愈勁，細馬仔狀態長勇。
第八場「蔡廄五歲馬」泥閘起步唔慢，然而長距離馬早段跟唔住合理非常，末段移出外檔追勢猶在，論狀態無走樣。同組「伍廄戰馬」早段留守後列，直路沿內欄追上後勁凌厲，同樣有佳態近戰外敵，此駒將出戰第七場冠軍一哩賽。
