上期教大家用雲數據、堅仔筆記、海外賽績揀馬，黎到季尾有樣野大家亦要留意，就係「堅仔騎練表」，踏入６月，唔少夠數畢業而又無野爭嘅馬房或者會「提早暑假，投奔初夏」，鬥志自然無咁鮮明。
亦有未夠數嘅下游馬房要趕畢業，鬥志會好，但大家投注時都要留意，馬房實力係咪真係夠 (如果咁易贏到，就唔使季尾先黎趕畢業啦)；當然最有實力又最有鬥志嘅就係「冠軍練馬師」嘅爭霸戰啦，尤其鬥到叮噹馬頭、難分難解果陣，馬房之間一定各不相讓，贏得一Win得一Win。
「堅仔騎練表」就係一個俾你季尾睇馬房鬥志嘅好平台，如圖中所見，大家見到練馬師下面有３排數字，其實由上至下分別代表住＂總成績＂、＂場地成績＂同埋＂近５賽日成績＂，今季暫時形勢係呂健威力追伍鵬志，上賽日終於追成平手，５９對５９，而伍鵬志暫時僅僅以較多嘅第２名仲頂得住；但大家要留意最後一排數字，近５賽日伍鵬志只得１Ｗｉｎ，而呂健威大手出擊下有６Ｗｉｎ、５個第二。
所以今個賽日一定要繼續跟實威哥嘅馬，至於俾人追到氣咳嘅伍鵬志馬房，鬥志亦唔會差，見有幾位堅仔馬評家都推薦隻５場９「機械騎士」，一於預埋佢，再綜合堅仔馬評家推薦威哥２匹機會馬，買條過關３ｘ７啦！
